పరుగాపక పయనించవె తలపుల నావ.... కెరటాలకు తలవంచితె తరగదు త్రోవ

September 3, 2009

జాతస్య మరణం ధృవమ్

"జాతస్య మరణం ధృవమ్" మరోసారి రుజువయ్యింది. ఏ నిమిషానికి ఏమి జరుగునో ఎవరూహించెదరు?  నిన్నటి వరకు ఈ రాష్ట్రాన్ని శాసించిన వ్యక్తి,  తన ఎత్తులతో జిత్తులతో  రాజకీయ ప్రత్యర్థులకి గుండెల్లో రైళ్ళు పరుగెత్తించి కంటి మీద నిద్ర లేకుండా చేసిన వ్యక్తి.....ఇక లేడు. దేవుడు మా పక్షమే అని గర్వంగా చెప్పుకున్న వ్యక్తి ఎవరికీ చెప్పకుండానే ఆ దేవుడి దగ్గరకు వెళ్లిపోయాడు!

చిద్విలాసంగా చేయి ఊపుతూ ఆత్మవిశ్వాసంతో హుందాగా ఠీవిగా నడిచొచ్చే రాజశేఖరరెడ్డి ఇక లేరు అంటే నమ్మశక్యంగా లేదు.  నిజంగా రాష్ట్ర చరిత్రలో ఇది ఓ దుర్దినం.  తను ఎలాంటి వ్యక్తి అయినా ఇలాంటి అర్థంతపు చావు అది కూడా 24 గంటల తరువాత కాని ఏం జరిగిందో ..అసలు ఎలా జరిగి ఉంటుందో అంతుపట్టని అయోమయం..గుర్తుపట్టటానికి కూడా వీలులేకుండా ముక్కలు ముక్కలయిపోయిన శరీరం..ఇలాంటి చావు ఎవరకీ వద్దు అనిపించేంతటి భీభత్సం.  అనామకంగా కారడవుల్లో,  హోరు వర్షంలో,  కొండల మధ్య  మంటలకు ఆహుతి అయ్యాడంటే నమ్మశక్యంగా లేదు.  జల యజ్ఞం...జల యజ్ఞం అని తపించిన వ్యక్తి ఇలా ప్రకృతి కన్నెర్రకి గురి కావటం విచిత్రమే!

తన గుండె ధైర్యం,  స్థిరచిత్తం,  మొండితమే తనకీ చావుని తెచ్చిపెట్టాయా?  నిన్న ఈ వార్త విన్నప్పటి నుండీ కూడా నాకు పూర్తి నమ్మకం, ఎక్కడో అడవుల్లో చిక్కుకుని పోయుంటారు,  ఇప్పుడో అప్పుడో తన ట్రేడ్ మార్కు నవ్వుతో చేయి ఊపుకుంటూ క్షేమంగా తిరిగి వచ్చేస్తారని.  రాత్రి కల కూడా......రాజశేఖరరెడ్డి గారి కుడి చేతికి ఓ చిన్న దెబ్బ తగిలింది, మరేం పర్లేదు క్షేమంగా ఉన్నారని.....అంతే ఇలానే జరిగి ఉంటుందని పొద్దున లేచాక కూడా ఓ ధీమా,  ఓ నమ్మకం... కానీ కాసేపటిలోనే అంతా అయిపోయిందన్న సమాచారం.

ఒక సంఘటన జరిగాక ఏవేవో వదంతులు వస్తుంటాయి.  భద్రతాలోపాలో.....నిర్ల్యక్షమో.....కారణాలుగా చూపిస్తుంటారు.  ఇలా చేసుండాల్సింది....అలా చేసుండకూడదు అని వృధా విశ్లేషణలు జరుపుతుంటారు.  కానీ ఏం చేసినా పోయిన ప్రాణాలు తిరిగి రావు కదా!  ఇక ఆ మనిషి లేడు తిరిగరాడన్న  నిజాన్ని మనం ఇంకా జీర్ణమే చేసుకోలేదు కాని మన రాజకీయనాయకులు మాత్రం ముఖ్యమంత్రి పదవి కోసం రాజకీయ జిత్తులకు అప్పుడే తెరలు తీసారు.

ముఖ్యమంత్రి గారితో పాటు  ఆయన ముఖ్య కార్యదర్శి సుబ్రహ్మణ్యం, భద్రతాధికారి వెస్లీ,  పైలట్లు భాటియా, సత్యనారాయణ రెడ్డి గార్ల ఆత్మకు శాంతి కలగాలని అశిస్తూ.....వారి కుటుంబ సభ్యులకు సానుభూతి తెలియచేస్తూ!!


5 వ్యాఖ్యలు:

మురళి September 3, 2009 at 3:33 PM  

విషాద వార్త...

Maruti September 3, 2009 at 6:54 PM  

ఆయనతో పాటు చనిపోయినవారందరి ఆత్మ శాంతించాలని కోరుకుంటున్నాను.

May his soul rest in peace!!

కొత్త పాళీ September 4, 2009 at 12:28 AM  

Truly shocking news in the morning. I too had some hope that he'd survived.

పరిమళం September 4, 2009 at 9:47 PM  

ఆయనకు , ఆయనతోపాటూ చనిపోయిన వారికీ ఆత్మశాంతి కలగాలని భగవంతుడ్ని ప్రార్ధిస్తున్నా !

Post a Comment

statcounter

  © Blogger template Coozie by Ourblogtemplates.com 2008

Back to TOP