రంగుల పండుగ......మరక మంచిదే

హోలీ-రంగుల పండుగ-మేము చదువుకునే కాలంలో అంటే ఓ 25 సంవత్సారాల క్రితం ఈ పండుగ గురించి కోస్తా ప్రాంతంలో పెద్దగా తెలియదు. శ్రీరామ నవమికి గులాం చల్లుకోవటమే తెలుసు కాని ఇలా రంగుల్లో మునగటం తెలియదు. మేము డిగ్రీలో వుండగా బాపట్ల ఇంజనీరింగు కాలేజి పిల్లలు కాస్తంత హోలీ ఆడేవారు. అమ్మాయిలు కూడా రోడ్ల మీదకి వచ్చి రంగులు చల్లుకోవటం మాకొక వింతగా వుండేది. ఆ తరువాత తమిళనాడులో కూడా ఈ పండగ అంతగా చేసుకునే వాళ్లు కాదు. తరువాత తరువాత దక్షిణాదిలో ఈ పండుగ వ్యాప్తి చెందటానికి మీడియా మరియు  సినిమాలే ముఖ్య కారణం అనిపిస్తుంటుంది నాకు.

పెళ్లయ్యాక తెలాంగాణా ప్రాంతానికి వెళ్లాక మాత్రం ఈ పండుగ తన అసలు రంగుల్లో కనపడింది. మేమున్న ప్రాంతంలో ఈ పండగ చాలా బాగా చేసుకునేవాళ్లు. పెద్దా చిన్నా ఆడా మగా తేడా లేకుండా అందరూ రోడ్ల మీదే వుండేవారు ఆరోజు. ముందే పిల్లలకి వళ్లంతా నూనె రాసి అట్టిపెట్టే వాళ్లం. హోలీ ఆడనివాళ్లు కాలనీలో చాలా తక్కువ వుండేవాళ్లు. ఆడటం  ఇష్టం లేని వాళ్లు ఇళ్లల్లో తలుపులేసుకుని కూర్చున్నా తలుపులు పగలకొట్టి మరీ వాళ్లని వాళ్లతోపాటు ఇంటిని కూడా రంగుల్లో ముంచి వెళ్లేవాళ్లు. పిల్లలకి కూడా మంచి సరదాగా వుండేది. అంతా రంగుల్లో మునగటం అయ్యాక మగవాళ్లు గోదావరిలో స్నానాలు చేసి వచ్చేవాళ్లు. ఇంట్లో ఆడవాళ్లకి ఇంటిని, పిల్లలని, వంటిని శుభ్రం చేసుకోవటం సరిపోయేది. తరువాత మధ్యాహ్నమో రాత్రో క్లబ్బులో హోలీ స్పెషల్ విందు కూడా వుండేది. అదొక సామూహిక వేడుక లాగా వుండేది. మరే పండగ కూడా ఇలా అందరూ కలిసి చేసుకోవటం కనిపించదు.

జనమంతా ఎంతో ఆనందంగా జరుపుకునే ఈ రంగుల పండుగలో అక్కడక్కడా అపశ్రుతులు వింటూ ఉంటాం. ఈ రంగులు కొంతమంది జీవితాలలో మాయని మరకలు మిగిలిస్తుంటాయి. విచక్షణా రహితంగా కృత్రిమ రంగులు వాడి  కళ్లు పోగోట్టుకునే వారు, చర్మ వ్యాధులతో, ఆస్త్మా సమస్యలతో,  ఇంకా వివిధ రకాల అలర్జీలతో బాధపడే వాళ్లు చాలా మంది ఉంటారు. అంతే కాదు కొన్ని రకాల కృత్రిమ రంగుల వల్ల కాన్సరు, మూత్రపిండాల సమస్యలు కూడా రావచ్చు. వేడుకగా రంగులు చల్లుకునే వాళ్లు కొన్ని సూచనలు పాటిస్తే ఈ రంగుల మరకలు మంచివే అవుతాయి.

1. సహజ రంగులనే వాడండి. ఇవి మన శరీరానికే కాదు పర్యావరణానికి కూడా మంచివి.
   
2. రంగులు ముఖంపై-ముఖ్యంగా కళ్లల్లోకి, ముక్కుల్లోకి, నోట్లోకి  పడకుండా చూసుకోండి. 
3. ఎదుటివారి ముఖాలపైనా కళ్లల్లోనూ రంగులు కొట్టకండి.
4. రంగులు చల్లుకునేటప్పుడు కళ్లద్దాలు పెట్టుకోవటం ఉత్తమం.
5. కళ్లల్లో రంగు పడ్డట్టు అనిపిస్తే వెంటనే కళ్లని చల్లటి నీటితో బాగా కడుక్కోండి, కంటికి ఏదైనా సమస్య ఏర్పడితే వెంటనే కంటి వైద్యుడిని సంప్రదించండి.. 
6. చంటిపిల్లలని ఈ వేడుకలకి దూరంగా వుంచండి.
   

సహజ రంగులని మనమే ఇంట్లో చేసుకోవచ్చు. పసుపు, కుంకుమ, పూలు, పళ్లు, ఆకులు, రకరకాల పిండులు- అసలు మనం వంటింట్లో నిత్యం వాడే వస్తువులు ఈ రంగుల తయారీలో వాడవచ్చు.  ఇంటికి,  వంటికి, పర్యావరణానికి అన్నిటికి మేలు చేసిన వాళ్లమవుతాం. ఇవి తయారు చేసుకోవటం కూడ సులువే. ఆకులని, పూలని, గింజలని ఎండబెట్టి పొడిచేసుకుని లేదా నీళ్లలో నానబెట్టి (అవసరమయితే కాస్తంత ఉడకపెట్టుకొని)  ఆపై కావలసినన్ని నీళ్లు కలుపుకుని చల్లుకోవటమే.

ఎరుపు రంగు కోసం గంధం, ఎర్ర మందార పువ్వులు, flame of forest (మోదుగ) పువ్వులు, గోగు పూలు, దానిమ్మ తొక్కు,  టమాటా, కారెట్టు, సున్నం పసుపుల మిశ్రమం.
పసుపు రంగు కోసం పసుపు శనగపిండిల మిశ్రమం, బంతి పూలు, పసుపుపచ్చ చేమంతి పూలు.
ఆకుపచ్చ రంగు కొరకు గోరింటాకు, గుల్‌మొహర్ ఆకులు, వీట్ జెర్మ్ (గోధుమ మొలకలు), పాలకూర, కొత్తిమీర, పుదీనా, టమాటా ఆకులు
బ్లూ రంగు కోసం సిరా చెట్టు (Indigo plant) అంటారు చూసారా దాని కాయలు.
ముదురు కెంపు రంగు కోసం బీటురూటు, ఉల్లిపాయ తొక్కలు.
పారిజాత పూల కాడలను ఎండబెట్టి వాటిని అవసరమయినప్పుడు నీటిలో నానపెడితే మంచి సింధూర వర్ణం తయారు.
బ్రౌన్ రంగు కోసం కాఫీ పొడి కాని టీ పొడి కాని మరగపెట్టిన నీళ్లు
ఇక నలుపు రంగు కూడా చేయవచ్చు ఎలా ఆంటారా-నలద్రాక్ష రసం వాడవచ్చు. అంతే కాదు ఎండబెట్టిన పెద్ద ఉసిరికాయల్ని ఓ ఇనుప మూకుడులో ఉడికించి ఓ రాత్రంతా అలాగే వదిలేసి మరునాడు కావలసినంత నీటిని కలుపుకుంటే మిలమిలలాడే నలుపు రంగు సిద్ధం.

అబ్బ ఈ మాత్రం శ్రమ కూడా మేం పడలేమంటారా సరే మనలాంటి వారి కోసం అదిలాబాదుకి చెందిన కొంతమంది మహిళలు మోదుగ పూలతో రంగులు తయారుచేసి అమ్ముతున్నారు. మన వ్యవసాయ విశ్వవిద్యాలయం వారు మరియు అదిలాబాద్ కృషివిజ్ఞానకేంద్రం వారు కలిసి ఈ రంగులు అమ్మే కేంద్రాన్ని నిన్నటినుండి (09/03/09) కోఠి మహిళా కళాశాల వద్ద ఏర్పాటు చేసారు. ద్రవరూపంలో అయితే ఒక సీసా 20 రూపాయలు పొడి రూపంలో అయితే ఒక్కో ప్యాకెట్టు 30 రూపాయలట. ఇంకా వివరాలు కావాలంటే 9989623829 కి ఫోను చేసి  తెలుసుకోవచ్చు.

అందరికి హోలీ శుభాకాంక్షలు.