పరుగాపక పయనించవె తలపుల నావ.... కెరటాలకు తలవంచితె తరగదు త్రోవ

August 30, 2011

హైదరాబాదు నుండి శ్రీశైలం దారిలో ఓ అద్భుతం..ఫరాహాబాద్

నిన్నటినుండి అలానే ట్యూన్ అయి ఉన్నారా! వేచి ఉన్నందుకు ధన్యవాదాలు.  రండి రండి... ఇప్పుడు మీకో అద్భుత ప్రదేశం చూపిస్తా. అదే ఫరాహాబాద్.



ఫరాహాబాద్.... హైదారాబాదు నుండి శ్రీశైలం వెళ్ళే దారిలో  హైదరాబాదు నుండి 150 కి్.మీ దూరంలో ఉంది.  హైదారాబాదు నుండి వెళ్ళేటప్పుడు కుడివైపున వస్తుంది.  ఓ పెద్ద పులి బొమ్మ ఉంటుంది అదే గుర్తు. పక్కన బోర్డు కూడా ఉంటుంది.  రోడ్డు బాగుంది కదా అని రయ్ రయ్‍న  పోతే మిస్సు అవుతాం..కాస్త మెల్లగా వెళ్ళండి.


పులి బొమ్మ కనిపించిందా?...కనిపించింది కదా!..పక్కనే ఓ పెద్ద ద్వారం కూడా ఉంటుంది చూడండి.  .పులి బొమ్మ పక్కనే ఓ గది ఉంది కదా..అక్కడకి పదండి..అక్కడ వాళ్ళు మీకు అన్ని వివరాలు చెప్తారు. లేకపోతే కింద చదవండి!!

ఫరాహాబాద్...ఇది నల్లమల అడవుల్లో ఓ చూడ చక్కని ప్రదేశం.  ఫరహాబాద్ అంటే అందమైన ప్రదేశం అని అర్థం అట! నల్లమలలో దేశంలోనే అతి పెద్ద పులుల సంరక్షణా కేంద్రం ఉంది. ఈ ఫరహాబాద్ దగ్గర టైగర్ సఫారీ ఉంది.  దీని గురించి ఎంతమందికి తెలుసో నాకు తెలియదు కాని నాకు ఈ మధ్యే తెలిసింది.

గేటు దగ్గరనుండి లోపలికి వెళ్లటానికి ఫారెస్టు డిపార్టుమెంటు వాళ్ల జీపులు ఉంటాయి..మన వెహికిల్సు లోపలికి వెళ్ళటానికి లేదు.  జీపుకి 500 రూపాయలు టిక్కెట్టు..ఇద్దరికయినా ఆరుగురికయినా అంతే. జీపు లెక్క అన్నమాట  జీపు డ్రైవరే గైడ్ కూడా.



ఓ జీపు తీసుకుని బయలుదేరాం.  జీపు డైవరు చాలా జంతువులు కనిపిస్తాయి అని చెప్పాడు మరి చూద్దాం ఏమేమి కనిపిస్తాయో!. మేము జీపు ఎక్కి బయలుదేరుతుండగా ఇంకో కుటుంబం వచ్చింది..వాళ్లూ ముగ్గురే..మాతో కలిసి వస్తామంటే సరే అన్నాం.

 



లోపలికి 11 కి.మి తీసుకెళ్ళి తీసుకొస్తారు.  రోడ్డు బాగానే ఉంది.  లోపల చెంచుల ఇళ్ళు ఉన్నాయి అందుకని  అక్కడక్కడా మనుషులు కనిపిస్తుంటారు.  ఇక మనుషులుండే దగ్గర జంతువులేం ఉంటాయి అనిపించింది..

కొంచం దూరం లోపలికి వెళ్ళగానే ఓ నాలుగు జింకలు రోడ్డుకి అడ్డంగా పరుగెడుతూ కనిపించాయి..పర్లేదు మన అదృష్టం బాగుంటే పులులు కూడా కనిపించవచ్చు అనుకున్నాం.



మధ్య మధ్యలో జంతువులు నీళ్లు తాగటానికి సిమెంటు తొట్లలాంటివి ఉన్నాయి. ఎండాకాలం వాటిల్లో నీళ్లు పోస్తారట.



ఇంకొంచం ముందుకి వెళ్ళాక పెద్ద చెరువు కనపడింది..చాలా పెద్దది.  వర్షపు నీళ్లన్ని ఆ చెరువులోకి వచ్చి కలుస్తాయి అట!  జీపు  చెరువు దాకా వెళ్లలేదు కాబట్టి దూరం నుండే చూసాం.

దార్లో ఎక్కువగా వెదురు చెట్లు,  అడ్డ తీగ (విస్తరాకులు) , టేకు చెట్లు కనిపించాయి.  ఆదీవాసీలు అడ్డాకులు ఏరుకెళ్ళి అమ్ముకుంటారట! ఓ చెట్టు కింద పెద్ద ఆకుల మూట కనపడింది.




 ఇంకేమైనా జంతువులు కనిపిస్తాయేమో అని ఉత్కంఠతతో చూస్తుంటే మరలా జింకలే కనిపించాయి. ఓ బుల్లి జింక పిల్ల చెంగు చెంగున గెంతుతూ పరుగులు తీస్తుంది. దాన్ని చూడగానే ....    ఫెలిక్సు జల్తేన్ రచనకి మహీధర నళినీ మోహన్ గారి అనువాదం "వనసీమలలో" పుస్తకంలోని బేంబీ గుర్తుకొచ్చింది.



అలా కొంచం ముందుకు వెళ్ళగానే ఓ పాడుపడ్డ భవంతి కనపడింది..అది అప్పట్లో నిజాం ప్రభువు కట్టించిందట! ఆయన అక్కడికి విహారానికి..వేటకి వెళ్ళినప్పుడు ఉండేవారట! దాన్ని షికార్‍గర్ అనేవారట!



 దారి పొడుగునా జింకలే కనపడ్డాయి.  ఏంటి రాజూ నాయక్ (డ్రైవర్ పేరు) జింకలు తప్పితే ఇంకేమీ లేనట్టున్నాయే అంటే.. ఎందుకు లేవండి..ఎలుగులు..అడవి పిల్లులు, నెమళ్ళు , నక్కలు ఉన్నాయి కానీ అలికిడికి అవి బయటకు రావు అని ఓ నవ్వు నవ్వాడు. ఎప్పుడయినా పులిని చూసావా అంటే చాలాసార్లు చూసానండి..రాత్రిపూట పెట్రోలింగ్‍కి వెళ్ళినప్పుడు కనపడతాయి అని చెప్పాడు.  ఇప్పుడొకటి కనపడితే బాగుండు అనుకున్నాం.


అలా ముందుకు వెళుతుంటే మరి కొన్ని జింకలు..దుప్పులు కనపడ్డాయి.  వాటికీ మనుషుల..వాహనాల అలికిడి అలవాటైపోయినట్లుంది..బెదరకుండా అలానే చూస్తూ ఉన్నాయి.

చివరికి ఓ ప్రదేశానికి తీసుకెళ్ళి జీపు ఆపేసి ఇక ట్రిప్పు చివరికి వచ్చేసింది..ఇక ఇదే లాస్టు పాయింటండీ అన్నాడు రాజూ నాయక్.  పక్కన ఓ కూలిపోయిన కట్డడం కనిపించింది.  ఇదేంటి అంటే ఇక్కడ అంతకుముందు రెస్టారెంటు ఉండేది..నక్సల్సు పేల్చేసారు అని చెప్పాడు.  హాంగింగు రెస్టారెంటు కూడా ఉండేదట..మొత్తం 12 కాటేజెస్ ఉండేవి..2006-2007 లో అన్నీ పేల్చేసారు అని చెప్పాడు. అసలు అవి కట్టిందే 2004 నట..ప్చ్!!




దిగి చుట్టూ చూసా..కూర్చోవటానికి రెండు బెంచీలు కనిపించాయి..ఇక ఏమీ లేదు అక్కడ...ఇక ఇంతే కాబోలు ఇక సఫారీ అయిపోయింది  అని కాస్త నిరాశ చెందా.

ఇంతలో రాజూ నాయక్ ముందుకి వెళుతూ ఇటురండి మీకొక వ్యూ పాయింటు చూపిస్తా అని కాస్త ముందుకు కొండ అంచుకి వెళ్ళాడు..

కొండ  చివరికి వెళితే ఓ పెద్ద లోయ..కాస్త ముందుకి వెళ్ళి చూస్తే మహాద్భుతం..కింద దట్టమైన లోయ..చాలా లోతులో ఉంది..కాస్త దూరంలో  ఓ చెరువు...ఆ దృశ్యం మహాద్భుతంగా ఉంది..వర్ణించటానికి మాటలు రావంతే. ఫోటోలు చూడండి..అవే మాట్లాడతాయి.



హోరు గాలి..నాలాంటి వాళ్లమయితే జాగ్రత్తగా ఉండకపోతే ఆ గాలికి పడిపోతాం కూడా.  అక్కడ ఎప్పుడూ గాలి అలానే ఉంటుందట. ఎంత బాగుందో!




అసలు ఈ వ్యూ పాయింటు చూడటానికి కొండ అంచున చెక్కతో చక్కగా ఓ ఫ్లాట్‍ఫారం లాంటిది కూడా ఉండేదట! నక్సలైట్లు అది కూడా పేల్చేసారట!




అడవిలో పెద్దగా జంతువులు కనిపించకపోయినా ఆ వ్యూ చూడటానికి అయినా వెళ్లొచ్చు అక్కడికి అనిపించింది నాకు. ఎంతసేపటికీ అక్కడినుండి రాబుద్ది కాలేదు.

మొత్తం ఈ ప్రయాణానికి గంటా పదిహేను నిమిషాలు పట్టింది.

ఆసక్తి ఉన్నవాళ్ళు హైదరాబాదు నుండి వచ్చేటప్పుడు ఫరాహాబాద్ గేటుకి ఓ ఐదారు  కి.మీ ల ముందే గుండం గేటు అని మరో గేటు వస్తుంది..అక్కడనుండి ట్రెక్కింగుకి వెళ్ళవచ్చట!  ఇంకా బాగా లోపలికి వెళితే సలేశ్వరం అనే వాటర్ ఫాల్సు ఉన్నాయట!

ఫరాహాబాద్ నుండి 11 గంటలకి బయలుదేరాం.  అక్కడి నుండి హైదరాబాదు వైపు మరో 40 కి.మీ వస్తే దిండి రిజర్వాయర్..దిండి నది మీద ఈ రిజర్వాయర్ కట్టారు. ఇది కూడా చూడటానికి బాగుంటుంది.



 రిజర్వాయర్ పైకి ఎక్కటానికి చక్కగా మెట్లు ఉన్నాయి..అలా సక్రమంగా ఎక్కితే ఎలా....ఇదుగో ఇలా అడ్డంగా పడి ఎక్కేసాం.



అక్కడ కాసేపు గడిపి హైదరాబాదు బయలుదేరాం.  మధ్యలో కడ్తాల్ దగ్గర సీతాఫలాలు కొనుక్కున్నాం! నాకు దారిలో అక్కడ ఒక్కచోటే సీతాఫలాలు కనిపించాయి.  బాగున్నాయి కూడా!

Read more...

August 29, 2011

హైదరాబాదు నుండి శ్రీశైలం దారిలో..ఓ అద్భుతం



ఈ శని ఆదివారాలు శ్రీశైలం వెళ్ళి వచ్చాం. మామూలుగా ఎప్పుడూ ఉదయాన్నే బయలుదేరి వెళ్లి సాయంత్రానికి వచ్చేసేవాళ్లం. ఈ సారి శనివారం సాయంత్రం బయలుదేరి వెళ్ళి ఆ రాత్రికి అక్కడ ఉండి ఆదివారం తిరిగి వచ్చాం.




శనివారం బయలుదేరే ముందు జోరున వాన. ఓ నిమిషం మానేద్దామా అనుకున్నాం..బయలుదేరాక మానుకోవటం ఎందుకులే అని 3:30 కి బయలుదేరాం.  అప్పటికి వర్షం కొంచం తగ్గింది. హైదరాబాదు దాటాక పెద్దగా వర్షం లేదు.

 బాగా మబ్బులు పట్టి వాతావరణం చాలా బాగుంది. మధ్య మధ్య సన్నటి తుప్పర. ఘాట్ ఎక్కేటప్పటికి చీకటి పడింది. మన్ననూరు దాటాక చిమ్మ చీకటి..ముందు రోడ్డు ఏమీ కనపడటం లేదు.  అలానే  రేడియం ఇండికేటర్ల  వెలుతురులో ప్రయాణం సాగించాం.




ఆ చిమ్మ చీకటిలో రోడ్దు మీద అక్కడక్కడా వరసగా రేడియం ఇండికేటర్ల ఎర్రటి కాంతి చూడటానికి ఎంత బాగుందో!

మధ్యలో ఒకచోట అయితే మేఘాలు ఎంత కిందగా ఉన్నాయంటే..మన ముందే తేలిపోతున్నాయి. అప్పుడే సన్నటి జల్లు.. అ జల్లులో ఈ మేఘాలు..మంచు జల్లు పడుతున్నటే ఉంది చూడటానికి..కాసేపు కాశ్మీరులో ఉన్నామా అనిపించింది.



ఎక్కడ మలుపు ఉందో..ఎక్కడ రోడ్డు వంపు ఉందో తెలియనంత దట్టమైన చీకటి..కారు చాలా జాగ్రత్తగా  నడపాల్సి వచ్చింది.




కొంచం రిస్కు ప్రయాణం అయినా బాగుంది. మధ్యలో్ జంతువులు ఏమైనా కనిపిస్తాయేమో అని చూసాం కాని ఏమీ కనపడలేదు.

రాత్రి పూట లైట్ల వెలుతురులో డామ్ వ్యూ కూడా బాగుంది.  బాగా వర్షాలు పడుతున్నాయి కదా గేట్లు ఎత్తుతారేమో అని ఆశపడ్డాం కానీ ఎత్తలేదు.




శ్రీశైలం చేరేటప్పటికి 8:30 అయింది.  బోలెడన్ని సత్రాలున్నాయి కదా రూము దొరుకుతుందిలే అని ముందుగా రూము బుక్కు చేసుకోకుండా ధీమాగా వెళ్లాం....సత్రంలో రూము దొరకలేదు. దేవస్థానం వాళ్ల రూము దొరికింది..ఛండీశ్వర సదనంలో.  A/C రూము కానీ A/C పనిచేయటం లేదు..(పని చేయటం లేదని చెప్పే ఇచ్చారు లేండి కానీ చార్జీలు మాత్రం  A/C  చార్జీలే:).  రూము బాగానే ఉంది. వేడి నీళ్లు కూడా ఉన్నాయి.

రూముకి వెళ్లేటప్పటికి 10 అయింది. ఉదయానికి అభిషేకం టిక్కేట్లు దొరుకుతాయేమో అని ప్రయత్నించాం..దొరకలేదు..కొంతమందేమో శ్రావణ మాసం సంధర్భంగా అభిషేకాల టిక్కెట్లు ఇవ్వటం లేదు....సామూహిక అభిషేకాలే జరుగుతున్నాయి అని చెప్పారు.

ఉదయం ఐదు గంటలకల్లా గుడికి వెళ్ళాం. వంద రూపాయల టిక్కెట్టు తో దర్శనం త్వరగానే అయిపోయింది. అమ్మవారి గుడికి వెళ్ళి దర్శనం చేసుకుని అక్కడినుండి బయటపడ్డాం.

దర్శనం అవగానే రోప్ వే దగ్గరకి వెళ్ళాం. ఉదయాన్నే కావటాన ఎక్కువమంది జనం లేరు. టిక్కెట్టు 50 రూపాయలు. అక్క మాహాదేవి గుహలు చూడాలంటే రెంటికీ కలిపి ఒకే టిక్కెట్టు తీసుకోవచ్చు..రెండిటికి కలిపి అయితే టిక్కెట్టు 230 రూపాయలు.  ఆ అక్క మహాదేవి గుహలు చూద్దాం అనుకున్నాం కాని అక్కడికి  పదకొండు గంటలకి కానీ తీసుకు పోరంట (అక్కడికి బోటులో వెళ్ళాలి).  పాతాళగంగ నుండి పది కిలోమీటర్ల దూరం అట!  అందుకని ఒక్క రోప్ వే కే వెళ్ళాం.

రోప్ వే నుండి కృష్ణమ్మ అందాలు

కృష్ణమ్మ మిలమిలలు

కృష్ణమ్మ ఒంపుసొంపులు



రోప్ వే   మరీ ఎక్కువ లేదు...కొంచం దూరమే కాని వ్యూ బాగుంది.  రోప్ వే నుండి వచ్చాక  అక్కడే గంగా హోటల్ అని ఉంటే అందులో టిఫిన్లు చేసి 8:30 కల్లా శ్రీ శైలం నుండి బయలుదేరాం.

మధ్యలో డామ్ వ్యూ పాయింటు దగ్గర  కాసేపు ఆగాం. అక్కడ  శ్రీశైలం కట్టినప్పుడు తీసిన కొన్ని ఫోటోలతో  ఓ గదిలో ప్రదర్శనలా పెట్టారు..ఆ గది ఇప్పుడు తెరుస్తున్నట్టు లేరు..అంతా దుమ్ము కొట్టుకుని పోయి ఉంది.




డాం వ్యూ పాయింటు దగ్గర కొన్ని ఫోటోలు తీసుకుని 8:30 కల్లా హైదరాబాదు బయలుదేరాం.




మధ్యలో లింగాల గట్టు దగ్గర బోలెడన్ని నున్నటి రాళ్లు (లింగాలు) ..ఓ చోట గుట్టగా ఉంటే పడి ఉంటే ఓ ఐదు రాళ్ళు తెచ్చేసుకున్నా!

ఇక అసలు ప్రయాణం మొదలయింది.  అలా చూడకండి..శ్రీ శైలం ప్రయాణం అనుకున్న దగ్గరనుండి నేను చూడాలనుకుంటున్న ఓ ప్రదేశం హైదరాబాదు ..శ్రీశైలం మధ్యలో వస్తుంది. ఆ ప్రదేశం ఎక్కడ మిస్సు అవుతామో అని కళ్లు పత్తికాయల్లా చేసుకుని చూస్తున్నా....అదే ఫరాహాబాద్..

దాని గురించి తరువాతి టపాలో వివరంగా..

అలానే ట్యూన్ అయి ఉండండి....


.

Read more...

August 26, 2011

జీవితంలో మొదటి ఆనందాలు!


జీవితంలో మొదటిది ఏదయినా అత్యంత అద్భుతంగా ఉంటుంది...
చిన్నప్పుడు..
మొదటగా వెళ్ళిన స్కూలు...
మొదటగా కొనుక్కున్న కలం..
మొదటగా కొనుక్కున్న గడియారం...
మొదటగా వేసిన చిత్రం..
మొదటగా చదివిన కథ..
మొదటిసారి రైలు ఎక్కటం..
మొదటిసారి స్నేహితులతో కలిసి చూసిన సినిమా...
మొదటగా వెళ్ళిన కాలేజి..

కుర్రకారుకి అయితే మొదటి ప్రేమ..
మొదటి ప్రేమలేఖ..
ఆ ప్రేమ సఫలమైనా...విఫలమైనా
చచ్చేదాకా గుండెల్లో గుడికట్టుకుని దాచుకుంటారు..

ఏదయినా మొదటిది అపురూపమే!
ఈ మొదటికి ఉన్న విలువ ఎనలేనిది!!
వాటిని తలుచుకోగానే
ఎక్కడికెక్కడికో వెళ్ళిపోతాం..
వాటితో అల్లుకుని వేవేల జ్ఞాపకాలు..

ఇక మొదటి ఇంటర్యూ...
మొదటి ఉద్యోగం..
మొదటి జీతం..
ఇవి ఎవరికయినా మరీ అపురూపం..

నా మొదటి ఉద్యోగం
ఓ కాలేజీలో
నా మొదటి జీతం అక్షరాలా 3500...
ఓ పది రోజులు పాఠాలు చెప్పినందుకు కాలేజీ వాళ్ళు ఇచ్చిన జీతం..
ఆ మొదటి జీతం తీసుకున్న రోజు ఎంత ఆనందం వేసిందో..
ఇప్పటి పిల్లలకి అది చిన్న మొత్తమేనేమో!
కానీ నాకు అది వెల కట్టలేని మొత్తం..

ఇక ఇప్పుడు మా అమ్మాయి వంతు...
సరిగ్గా తన పుట్టిన రోజు నాడే (ఇంగ్లీషు తేదీల ప్రకారం)
తనకి మొదటి ఉద్యోగం ఇంటర్యూ..
కాంపస్ ఇంటర్యూలో ఎంపికయ్యింది..
ఉద్యోగం చేసే ఉద్దేశ్యం లేకపోయినా
మొదటి ఉద్యోగం తన పుట్టినరోజు నాడే రావటం...
తనకి ఇంకా మహదానందం కదా!!

Read more...

August 23, 2011

పుస్తక ప్రియుల కోసం


పుస్తక ప్రియులకి ఓ రుచికరమయిన వార్త!

జస్టు బుక్సు అని ఓ రిటైల్ కమ్యూనిటీ లైబ్రరీ చెయిను వారు ఇప్పుడు హైదరాబాదులో కూడా తమ లైబ్రరీలు ప్రారంభించారు. కూకట్‍పల్లిలో ఒకటి, ఇసిఐఎల్ దగ్గర ఒకటి ప్రారంభించారు.



ఇక్కడ 4,00,000 పుస్తకాలు లభ్యం! ఉచిత హోమ్ డెలివరీ కూడా ఉంది!
సభ్యత్వ రుసుము నెలకి 150 నుండి మొదలు!
లైబ్రరీ ఉదయం 10 గంటలనుండి రాత్రి 9 గంటల వరకు తెరిచి ఉంటుంది.
సోమవారం సెలవు. 
 
ఆన్ లైనులో కూడా పుస్తకాలు తెప్పించుకునే సదుపాయం ఉంది. 7 కి.మి లోపు దూరం వారికి ఉచితంగా ఇంటికి పుస్తకాలు పంపబడతాయి. మెంబరుషిప్పుకి రకరకాల ప్లాన్సు ఉన్నాయి. ఒక్కసారి వాళ్ల వెబ్ సైటు చూస్తే అన్ని వివరాలు తెలుస్తాయి.

హైదరాబాదులో ఈ లైబ్రరీల అడ్రస్సు కోసం ఈ లింకు చూడండి.

Read more...

August 16, 2011

పాలగుమ్మి... మా ఊరు ఒక్కసారి పోయి రావాలి

అప్పుడెప్పుడో మా ఊరి గురించి వ్రాసుకుంటూ పాలగుమ్మి విశ్వనాథం గారు పాడిన.. మా ఊరు ఒక్కసారి పోయి రావాలి ....పాట గుర్తుచేసుకున్నా. ఎప్పుడో నలభై సంవత్సరాల క్రితం వ్రాసిన పాట..అప్పటికి ..ఇప్పటికీ ..ఎప్పటికీ నిత్యనూతనం ఈ పాట.

ఈ మధ్య అదే పాట పదాలు కాస్త మార్చి కొత్త.చరణాలు కలిపి మల్లేష్ అనే అతను పాడింది విన్నా.  శ్రీ నిలయం అనే ఆల్బంలో ఉంది ఈ పాట (ఆల్బం మీద అయితే వ్రాసింది పాలగుమ్మి గారనే ఉంది).

ఈ పాటకి.... పాలగుమ్మి గారు పాడిన పాటకి భావంలో తేడా లేకపోయినా పాలగుమ్మి గారి గొంతులోని ఆర్తి ఇందులో నాకు కనపడలేదు. పాటలో  హైలెస్సో..గౌరమ్మ .... బతుకమ్మ....మరి కొన్ని తెలంగాణా పదాలు  చేర్చి తెలంగాణైజేషన్ చేసారు.  ఇప్పటి అభిరుచులకు తగ్గట్టు నేపద్య సంగీతం పెట్టారు..అయినా ఏదో లోటు.

పాట మంచి హుషారుగా బాగుంది కానీ పాలగుమ్మి గారి పాట వింటుంటే మన ఊరు మన కళ్ల ముందు మెదులుతుంది.  ఊర్లో కోవెల...పంట చేలు..పైర గాలి...దూరమైన మన నేస్తాలు గుర్తుకొచ్చి.....జ్ఞాపకాల బరువుతో  కళ్లు చెమ్మగిల్లుతాయి. మల్లేష్ గారి పాట ఇంతగా గుండెల్ని తట్టదు.  ఓ హుషారయిన పాట వింటున్నట్టుంటుంది.. లేచి చిందేయ్యాలనిపిస్తుంది... కానీ  జ్ఞాపకాల  అనుభూతుల్ని తడమదు.

దాదాపు అవే పదాలు..అదే భావం...కానీ ఎందుకని పాలగుమ్మి గారి పాటకి స్పందించినంతగా మల్లేష్ పాటకి స్పందించలేకపోతున్నాం ..పాలగుమ్మి గారి గొంతులోని ఆర్తి..మనల్ని కదిలిస్తుంది.  ముఖ్యంగా "ఆగలేక నా కన్నులు.. చెమ్మగిల్లాలి"...  పాడేటప్పుడు ఆ గొంతులో ఎంత భావం పలికిస్తాడో!

ముందుగా పాలగుమ్మి గారి పాట వినకుండా మల్లేష్ గారి పాట వింటే బాగానే ఆనందించగలమేమో.

ఘజల్ శ్రీనివాస్ గారు కూడా  ఇదే భావంతో ఇంచుమించు ఇలాంటి మాటలతోనే ఒక పాట వ్రాసారు..ఒక్కసారి ఊరు పోయిరా ...అంటూ.  అది కూడా బాగుంటుంది. ఘజల్ కదా భావుకత పాలు కాస్త ఎక్కువగా ఉంటుంది.

మూడిటిలోనూ నాకు పాలగుమ్మి గారిదే ఇష్టం.

మూడిటి సాహిత్యం ఇస్తున్నాను..మీరే చూడండి.

మొదటిది పాలగుమ్మి గారు వ్రాసి ..స్వరపరచి... పాడినది.



పంట చేల గట్ల మీద నడవాలి..
ఊహలేమొ రెక్కలొచ్చి ఎగరాలి..
పంట చేల గట్ల మీద నడవాలి..
ఊహలేమొ రెక్కలొచ్చి ఎగరాలి..

మా ఊరు ఒక్కసారి పోయి రావాలి..
జ్ఞాపకాల బరువుతో తిరిగి రావాలి..

మా ఊరు ఒక్కసారి పోయి రావాలి..
జ్ఞాపకాల బరువుతో తిరిగి రావాలి..

ఒయ్యారి నడకలతో ఆ ఏరు..
ఆ ఏరు దాటితే మా ఊరు..
ఒయ్యారి నడకలతో ఆ ఏరు..
ఆ ఏరు దాటితే మా ఊరు..

ఊరి మధ్య కోవెలా.. కోనేరు..
ఒకసారి చూస్తిరా తిరిగి పోలేరు..
ఊరి మధ్య కోవెలా.. కోనేరు..
ఒకసారి చూస్తిరా వదిలి పోలేరు..

పంట చేల గట్ల మీద తిరగాలి..
ఊహలేమొ రెక్కలొచ్చి ఎగరాలి..
మా ఊరు ఒక్కసారి పోయి రావాలి..
జ్ఞాపకాల బరువుతో తిరిగి రావాలి..

పచ్చని పచ్చిక పైన మేను వాల్చాలి...
పైరగాలి వచ్చి నన్ను కౌగిలించాలి...
పచ్చని పచ్చిక పైన మేను వాల్చాలి...
పైరగాలి వచ్చి నన్ను కౌగిలించాలి...

ఏరు దాటి తోట.. తోపు తిరగాలి...
ఎవరెవరో వచ్చి నన్ను పలకరించాలి...
ఏరు దాటి తోట ..తోపు తిరగాలి...
ఎవరెవరో వచ్చి నన్ను పలకరించాలి...

మా ఊరు ఒక్కసారి పోయి రావాలి..
మా ఊరు ఒక్కసారి పోయి రావాలి..

చిన్ననాటి నేస్తాలు చుట్టూ చేరాలి...
మనసువిప్పి మాట్లాడే మనుషుల కలవాలి...
చిన్ననాటి నేస్తాలు చుట్టూ చేరాలి...
మనసువిప్పి మాట్లాడే మనుషుల కలవాలి...

ఒకరొకరు ఆప్యాయతలొలకబొయ్యాలి...
ఆగలేక నా కన్నులు.. చెమ్మగిల్లాలి...
ఒకరొకరు ఆప్యాయతలొలకబొయ్యాలి...
ఆగలేక నా కన్నులు.. చెమ్మగిల్లాలి...

పంట చేల గట్ల మీద నడవాలి..
ఊహలేమొ రెక్కలొచ్చి ఎగరాలి..
మా ఊరు ఒక్కసారి పోయి రావాలి..
జ్ఞాపకాల బరువు తో తిరిగి రావాలి..
మా ఊరు ఒక్కసారి పోయి రావాలి.
జ్ఞాపకాల బరువు తో తిరిగి రావాలి..

*******************************************************************

ఇక రెండవది..శ్రీనిలయం ఆల్బం లో మల్లేష్ గారు పాడింది. దీని ఆడియో సరిగ్గా లేదు...మధ్య మధ్యలో కట్ అవుతుంది.



పంట సేల గట్ల మీద నడవాలి
ఊహలకు రెక్కలొచ్చి ఎగరాలి
మా ఊరు ఒక్కసారి పోయి రావాలి
జ్ఞాపకాల బరువుతో తిరిగి రావాలి

మా ఊరు ఒక్కసారి పోయి రావాలి
జ్ఞాపకాల బరువుతో తిరిగి రావాలి

ఒహో..ఒహో...

ఒయ్యారి నడకలతో సెలఏరు,
ఆ ఏరు దాటితేనే మా ఊరు!
ఒయ్యారి నడకలతో సెలఏరు,
ఆ ఏరు దాటితేనే మా ఊరు!

ఊరి మధ్య కోవెలా....కోనేరూ
ఒక్కసారి చూస్తిరా ...తిరిగి రాలేరు

మా ఊరు ఒక్కసారి పోయి రావాలి
జ్ఞాపకాల బరువుతో తిరిగి రావాలి

ఓ..ఓ..ఓహో..ఒహో..
హైలెస్స..ఓ..ఓ..హైలెస్సా..
ఓహో..ఓహో...హైలెస్స...ఓ ..ఓఓఓఓ

చిన్ననాటి స్నేహాలు చుట్టూ చేరాలి
మనసువిప్పి మాట్లాడే మనుషుల కలవాలి
చిన్ననాటి స్నేహాలు చుట్టూ చేరాలి
మనసువిప్పి మాట్లాడే మనుషుల కలవాలి
ఒకరికొకరు ఆప్యాయతలొలకబొయ్యాలి
ఆగలేక నా కన్నులు చెమ్మగిల్లాలి

మా ఊరు ఒక్కసారి పోయి రావాలి
జ్ఞాపకాల బరువుతో తిరిగి రావాలి

బతుకమ్మ బతుకమ్మ ఉయ్యాల
బంగారు బ్రతుకమ్మ ఉయ్యాల
మన గౌరి గౌరమ్మ ఉయ్యాల
మా ఊరి వెలుగంట ఉయ్యాలో

మా ఊరి పక్కనే చెరువుంది
ఆ చెరువు గట్టు మీద రెండు చెట్లున్నాయి
మా ఊరి పక్కనే చెరువుంది
ఆ చెరువు గట్టు మీద రెండు చెట్లున్నాయి
చెట్లకింద బ్రతుకమ్మలాట చూడాలి
పక్కనున్న పైరు చూసి పరవశించాలి

మా ఊరు ఒక్కసారి పోయి రావాలి
జ్ఞాపకాల బరువుతో తిరిగి రావాలి

గోవుల్ని కాసేటి గోవిళ్లు అందంబు
ఆ గోవిళ్లు పాడేటి పాటలందంబు
సందెవేళ చప్పట్ల కోలాటాలందంబు
ఆడుతూ ఊగే వంగుటుయ్యాల అందంబు

మా ఊరు ఒక్కసారి పోయి రావాలి
జ్ఞాపకాల బరువుతో తిరిగి రావాలి
ఆ జ్ఞాపకాల బరువుతో తిరిగి రావాలి

పాట అంతా దాదాపుగా ఒక్కటిగానే ఉన్నా చివరి రెండు చరణాలు చూడండి..అవి పాలగుమ్మి గారు పాడిన దాంట్లో ఉండవు.

************************************************************************

ఇక మూడవది ఘజల్ శ్రీనివాస్ గారిది.


Get this widget | Track details | eSnips Social DNA


ఏరా రాముడూ ఊడుపులైపోయినియేంట్రా
లేదురా రేపో మాపో మొదలెడతాను
సరే సాయంత్రం సావిడికాడికొచ్చెయ్
అక్కడ కబుర్లు సెప్పుకుందాం
అలాగే  తుర్ర్.. హై హై హై

ఒక్కసారి ఊరు పోయిరా
ఒక్కసారి ఊరు పోయిరా
బతికిన పల్లెలకోసం
ఒక్కసారి ఊరు పోయిరా
అనుభూతుల మల్లెల కోసం
ఒక్కసారి ఊరు పోయిరా
బతికిన పల్లెలకోసం
ఒక్కసారి ఊరు పోయిరా
అనుభూతుల మల్లెల కోసం

సంక్రాంతి ముగ్గుల్లు.... గొబ్బిళ్ళో
మాలక్ష్మి దీవించు గొబ్బిళ్ళో
మాలక్ష్మి దీవించు గొబ్బిళ్ళో
మా ఊరికివ్వాలి పంటల్లు

ముద్దొచ్చే అమ్మాయిలు దిద్దే ముగ్గుల గీతలు
ముద్దొచ్చే అమ్మాయిలు.. హాయ్.. దిద్దే ముగ్గుల గీతలు
 ఒక్కసారి ఊరు పోయిరా
ఒక్కసారి ఊరు పోయిరా
పడుచుల జడ గంటలకోసం
ఒక్కసారి ఊరు పోయిరా..

అందరినీ పలకరించూ...కథలెన్నో వినిపించూ
ఏరా రాముడూ ఈ మద్య కనిపించట్లేదేమిట్రా
అందరినీ పలకరించూ...కథలెన్నో వినిపించూ
ఒక్కసారి ఊరు పోయిరా
ఒక్కసారి ఊరు పోయిరా
ముసలి అవ్వలకొసం
ఒక్కసారి ఊరు పోయిరా

చెల్లియో చెల్లకో తమకు చేసిన ఎగ్గులు...
రామ నవమి పందిరిలో...నాటకాల సందడిలో
బావా ఎప్పుడు వచ్చితీవు..
రామ నవమి పందిరిలో.... నాటకాల సందడిలో
ఒక్కసారి ఊరు పోయిరా
నాన్నా..
ఒక్కసారి ఊరు పోయిరా
అల్లరి పిల్లలకోసం
ఒక్కసారి ఊరు పోయిరా

ఏటిగట్టు సరదాలు...పాటమీద పగ్గాలు
ఏరా ఎంకన్నా మేట్నీకొత్తావేంట్రా ఈరోజూ?
ఆ కుదరదురా సాయంత్రం వెంకటలక్ష్మి తోటకి రమ్మందిరా..
ఏటిగట్టు సరదాలు...పాటమీద పగ్గాలు
ఒక్కసారి ఊరు పోయిరా
మిత్రమా..ఒక్కసారి ఊరు పోయిరా
చిననాటి మనసుల కోసం
ఒక్కసారి ఊరు పోయిరా

తాననన్న తాననన్న తాననన్న హో..
తననానన తననానన

పల్లెటూరి పిల్లకదా.....పట్నం రాలేదు కదా.
ఓ హొహొ హొహొ ఓ హొహొహొహొ హొయ్
పల్లెటూరి పిల్లకదా.....పట్నం రాలేదు కదా.
ఒక్కసారి ఊరు పోయిరా
ఒక్కసారి ఊరు పోయిరా
కురిసే వెన్నెల కోసం

ఒక్కసారి ఊరు పోయిరా
బతికిన పల్లెలకోసం
ఒక్కసారి ఊరు పోయిరా
అనుభూతుల మల్లెలకోసం
ఒక్కసారి ఊరు పోయిరా
బతికిన పల్లెలకోసం
ఒక్కసారి ఊరు పోయిరా
అనుభూతుల మల్లెలకోసం
ఆ ఏరులకోసం... ఆ నవ్వులకోసం
ఆ కోవెలకోసం... ఆ పొలాల కోసం
ఆ సిగ్గులకోసం... చలిమంటలకోసం
ఆ పంటలకోసం.... ఆ వెన్నెలకోసం..

దీని వీడియో కావాలంటే ఇక్కడ చూడవచ్చు. పాట ఉన్నంత అందంగా వీడియో లేదు అనిపించింది!

ఈ టపా ప్రత్యేకంగా  వేణూ శ్రీకాంత్ కి.

**************************************************************

మీరు పాట వింటూ ఈ టపా చదవవచ్చు.  వద్దనుకుంటే  శ్రీనిలయం ఆడియో క్లిప్ ని ఆపేసెయ్యండి:)

Read more...

August 13, 2011

శ్రావణ పౌర్ణమికి మా ఇంట ఉదయించిన చందమామ

మా ఇంటి జాబిల్లి

సరిగ్గా ఇరవై ఏళ్ల క్రితం.... ఓ శ్రావణ పౌర్ణమి రోజు..

అమ్మాయా..అబ్బాయా అని అందరం ఆతృతగా ఎదురు చూస్తుండగా... రాత్రి 8:35 కి ---- ఆకాశంలోని పున్నమి చంద్రుడితో పోటీ పడుతూ...మా ఇంటి చందమామ ఈ లోకంలోకి అడుగు పెట్టింది.

చిన్న చిన్న కాళ్ళు...చిన్న చిన్న చేతులు..నాలో ప్రాణం పోసుకున్న మరో ప్రాణిని ...మొదటిసారి ఒళ్ళోకి తీసుకున్న ఆ క్షణం..అంతకన్నా మధుర క్షణం... ఈ జీవితంలో మరొకటి ఉండదేమో!  ఆ నులివెచ్చని మొదటి స్పర్శ...కొత్తగా ..వింతగా...ఇప్పటికీ అదొక మధురానుభూతి.

అక్కడి నుండి తనతో గడిపిన ప్రతి క్షణం అపురూపమే. తొలి అడుగు..తొలి మాట..తొలి పాట... తన ప్రతి కదలికని..తన ఎదుగుదలని అక్షరబద్దం..చిత్రబద్దం.. చేసి పెట్టుకున్నాం.

చుట్టుపక్కల నాలుగిళ్ళకి తనే పసిపిల్ల..అందరి గారాబం..ఇల్లేరమ్మలా లేచింది మొదలు ఇళ్లమ్మట తిరుగుతుండేది..

గోరింటాకు పెట్టి చేతులు రెండూ సాక్సుల్లో కట్టేసామని ఓ అర్థరాత్రి లేచి ఏడ్చిన ఏడుపుకి లైనులో అందరూ లేచి వచ్చి ఊరడించిన చిత్రం...

నాన్న ముక్కుని పట్టుకుని కసుక్కున కొరికిన చందం..

మొదటిసారి పలక మీద అ..ఆ..లు దిద్దమంటే నేను దిద్దనని మొండికేసిన వైనం...

స్కూలుకి వెళ్ళనని చేసిన  మారాం...

స్కూలులో టీచర్ టేబులెక్కి అక్కడే కూర్చుంటానని  చేసిన అల్లరి..

ఒకటా రెండా..ఎన్నెన్ని అనుభూతులు...

అందుకే శ్రావణ పౌర్ణమి అంటే నాకు రాఖీ పండగ అని కన్నా మా అమ్మాయి పుట్టిన రోజుగానే ఎక్కువ గుర్తు ఉంటుంది.

రాఖీ పండగకి ..రాఖీలు కట్టటం మాకు అలవాటు లేదు.  చిన్నప్పుడు అసలు ఇలా ఓ పండగ చేసుకుంటారని కూడా తెలియదు.

మా పిల్లలు వచ్చాక మాత్రం మా అమ్మాయి స్నేహితులని చూసి తనూ సరదాగా వాళ్ళ తమ్ముడికి కట్టటం మొదలుపెట్టింది. వాడికీ ఇలాంటివి అంత నచ్చవు.. బలవంతాన కట్టేది. మంచం మీదనుండి లేవటానికే కూడా బద్దకించేవాడు..ఇలాగే కట్టు అని చెయ్యి ఇచ్చేవాడు.  పాచి మొహానే కట్టించుకునేవాడు అన్నమాట.  కట్టాక ఓ అరగంట కూడా ఉంచుకునేవాడు కాదు..తీసి పడేసేవాడు.  బాగా చిన్నప్పుడు ఇలా రాఖీ కట్టించుకున్నాక అక్కకి ఏమైనా గిఫ్టు ఇవ్వాలి ఇవ్వు అంటే ఏంటి ఇచ్చేది అనేవాడు. పోనీలే ఇవాళ అక్క పుట్టిన రోజు కూడా కదా ఇవ్వు అంటే ఇచ్చేవాడు.

ఇప్పుడు దూరాన ఉన్నాడు కదా..మా అమ్మాయికి ప్రేమాప్యాయతలు ఇంకా పెరిగిపోయాయి.  ఓ మంచి కార్డు తనే స్వయంగా  తయారు చేసి రాఖీతో పాటు పంపింది. వాడసలు దాన్ని  తెరిచి చూస్తాడో లేదో కూడా నాకు అనుమానమే!

Read more...

August 8, 2011

ఆధార్ కార్డు నాకు నచ్చలేదు!

ఎన్నాళ్లనుండో ఎదురు చూస్తున్న ఆధార్ కార్డు మొన్ననే వచ్చింది. ఈ కార్డు రావటానికి మేము ఫోటోలు తీయించుకున్నాక ఖచ్చితంగా మూడు నెలలు పట్టింది.  ఇప్పుడు కూడా మా ఇంట్లో మా నలుగురిలోనూ ఇద్దరివే వచ్చాయి..మిగత ఇద్దరివి..నెట్టులో చూస్తే ఇంకా వివరాలు అందలేదు అని వస్తుంది. సరే ఎప్పటికో అప్పటికి అవి కూడా వస్తాయి కానీ అసలు నాకు ముందు కార్డు రూపురే్ఖలు నచ్చలేదు.

ఆధార్...సామాన్యుని హక్కు

కాప్షన్ బాగుంది కానీ...ఇకపై ఉప్పు కావాలన్నా..పప్పు కావాలన్నా..గాస్ కావాలన్నా..బ్యాంక్ అకౌంటు తెరవాలన్నా...  అన్ని నిత్యావసరాలకి ...దేనికయినా ఆధారం ఇదే...మీరు మీరే అనటానికి ఇకనుండి ఋజు పత్రం (identity proof) ఇదే అంటున్న ఈ కార్డు రూపురేఖలు ఎలా ఉన్నాయో ఒక్కసారి చూడండి. ఏదో కరపత్రం లాగా ఉంది కానీ కార్డు లాగా లేదు.


నందన్ నీలేకని ఆధ్వర్యంలో జరుగుతున్న ప్రాజెక్టు కనుక దీని గురించి నేను కాస్త ఎక్కువే   ఊహించుకున్నా..కానీ కార్డు చూడగానే నాకు చాలా నిరుత్సాహం కలిగింది.

ఇకపై భారత పౌరుల జీవితాలకి ఆధారం ఇదే అని ప్రభుత్వాలు ఎలుగెత్తి చెప్తున్న ఈ కార్డు చాలా పొడవుగా ఉంది...నాణ్యత కూడా అంతంత మాత్రమే. కాస్త మందపాటి గ్లేజ్‍డు పేపరు వాడారు.  కనీసం లామినేషన్ కూడా లేదు.



కింద పేరు.. ఆధార్ నంబరు వరకు మాత్రమే కార్డుగా ఉన్నట్లయితే బాగుండేది...మరి అక్కడ వరకు కత్తిరించి వాడుకోవచ్చేమో తెలియదు. మిగతా వివరాలన్నీ కార్డు మీద అవసరం లేదు కూడాను.

ఏది ఏమయినా జీవితాంతం మనతో ఉండాల్సిన ఈ కార్డు ఇలా ఉండటం నాకు అసలు నచ్చలేదు. ఈ కార్డు డిజైను చేసింది ఎవరో కానీ ఈ మాత్రం ఆలోచించలేదా అనిపించింది. దీనిని డిజైను చేసిన వాళ్లు, దానికి అనుమతి ఇచ్చిన వాళ్లు..దాన్ని అమలులోకి తీసుకొస్తున్న వాళ్లు..ఇంతమందిలో ఏ ఒక్కరూ కార్డు పోర్టబిలిటి గురించి కానీ దాని మన్నిక గురించి కానీ ఆలోచించినట్లు కనిపించటం లేదు.  ATM కార్డు లానో, క్రెడిట్ కార్డులానో...  ఓటరు కార్డులానో ..రేషను కార్డులానో ఇది కూడా ఎక్కడికంటే అక్కడికి తీసుకెళ్లటానికి అనువుగా నాణ్యంగా ఉంటే బాగుండేది.

ఓ సంతోషకరమైన విషయం ఏమిటంటే ఓటరు కార్డులో లాగా ఇందులో అచ్చు తప్పులు లేవు.  తెలుగు అక్షరాలు తెలుగు అక్షరాలా లాగానే చక్కగా ఉన్నాయి. పేర్ల తారుమారులు..తలల తారుమారులు...లింగాల తారుమారులు లేవు.  ఫోటోలు తీయించుకునేటప్పుడే పేరు... అడ్రస్సు...అన్నీ జాగ్రత్తగా ఒకటికి నాలుగు సార్లు సరిచూసుకుని అక్కడ డాటా ఎంట్రీ వాళ్ళకి తెలుగు అక్షరాలు ఎలా వ్రాయాలో క్లాసు పీకాం అనుకోండి:)

Read more...

August 1, 2011

ఓ రెండు స్ఫూర్తిదాయక వార్తలు

"Teach for India"

ఓ మూడు సంవత్సరాల క్రితం షాహీన్ అనే ఆమె మొదలుపెట్టిన ఓ టీచింగ్ ప్రోగ్రాం ఇది.  విద్యా వసతులు సరిగ్గా లేని మురికివాడలల్లో..గవర్నమెంటు స్కూల్సులో పిల్లలకి.. కాలేజీలనుండి ఫ్రెష్షుగా బయటికి వచ్చే విద్యార్థులు...యువ ప్రొఫెషనల్సు చేత చదువు చెప్పించే కార్యక్రమం ఇది.  ఈ చదువు చెప్పే వాళ్లకి ఫెలోషిప్సు ఉంటాయి. ఈ ప్రోగ్రాంలో చేరటానికి ముందుగా సెలెక్షన్ ప్రాసెస్ ఉంటుంది. అందులో ఎంపికయితే రెండు సంవత్సరాలు పని చేయాలి.

సేవ చేసే అవకాశంతో పాటు ఉపాధి కూడా లభించే ఈ కార్యక్రమం మన యువతకి చాలా మంచి అవకాశం. ఇప్పటికే ముంబై..పూనే..ఢిల్లీ లలో జరుగుతున్న ఈ కార్యక్రమం ఈ సంవత్సరం నుండి హైదరాబాదు.. చెన్నైలలో కూడా  మొదలుపెట్టబోతున్నారు. ఆసక్తి ఉన్నవాళ్లు ప్రయత్నం చేయవచ్చు.

ఇక రెండవ వార్త

పోలియో వచ్చి 80% డిసెబిలిటి ఉన్న ఆమె 40 ఏళ్ల వయస్సులో స్విమ్మింగ్ నేర్చుకుని ఇతరులకి ఎలా స్ఫూర్తిదాయకంగా ఉందో చెప్పే వార్త.

జీవితంలో ఎదురయ్యే చిన్న చిన్న ఒడిదుడుకులకి....అపజయాలకి.. ఆత్మహత్యలు చేసుకునే యువతకి ఇది ఓ కనువిప్పు కావాలి.

ఏదయినా చేయాలన్న ఓ  తపన....ఎన్ని అవాంతరాలు ఎదురయినా చేయగలమన్న ఓ ధృఢ సంకల్పం ..మంచిపనికి మరో పది చేతులు ఆసరాగా ఉంటాయన్న ఓ నమ్మకం ఉంటే ఏ పనైనా చేయగలం అనిపిస్తుంది కదూ!

Read more...

statcounter

  © Blogger template Coozie by Ourblogtemplates.com 2008

Back to TOP