రమణ లేని బాపు

అయ్యో బాపూ!

చిన్నీ రమణ గారు పోయారంట!

పొద్దున్నే టి.వి. లో వార్త చూసి మా ఆయన పెట్టిన కేక వినగానే
నాకు నోటివెంట వచ్చిన మొదటి మాట
 అయ్యో బాపూ!

బాపు-రమణ..
ఒక్క తెలుగు వారికే సొంతమయిన అరుదయిన జంట!
తనువు మనస్సూ ఒకటిగా మెలిగిన అపురూప స్నేహితులు
తెలుగు సినిమాకి...తెలుగు సాహిత్యానికి ఓ గుర్తింపు తెచ్చిన మహనుభావులు
ఇంతకాలం వాళ్ళిద్దరి పేర్లు కలిపి చదవాటానికి అలవాటుపడ్డ మనం
వాళ్ళిద్దరిని జంటగా చూడ్డమే అలవాటయిన మనం
ఇకనుండి ఒట్టి బాపు గారినే చూస్తాం అనుకుంటే ఎంత బాధగా ఉందో!
మనకే ఇంత బాధగా ఉంటే బాపూ గారికి ఇంకెంత తీరని లోటు!
ఆ క్షణం దాకా తనతో ఉన్న తన సహచరుడు
ఇక తనతో లేడు అనుకుంటే
అయ్యో బాపూ!

మీ ఇద్దరూ కలిసి తెలుగు వారికి
ఓ బుడుగుని... ఓ సీగానపెసూనని
ఓ రెండు జళ్ళ సీతని....ఓ గోపాలాన్ని
అన్నిటికీ మించి ఓ కోతికొమ్మచ్చిని
ఇచ్చినందుకు ఏమిచ్చి
మీ ఋణం తీర్చుకోగలం

పోయినోళ్ళందరూ మంచోళ్ళూ
ఉన్నోళ్ళు పోయినోళ్ల తీపి గురుతులు
అనుకుని ఊరట చెందటం తప్ప!!

Read more...

మనిషి దూరమయితే మాత్రమేమి

అసలు రోజులు ఇంత తొందరగా ఎలా గడిచిపోయాయో!
అంతా నిన్న మొన్న జరిగినట్టు ఉంది.
 ఆ క్షణం దాకా మనతో ఉన్న మనిషి మరు క్షణం దూరమయితే!
 ఏదీ అర్థంకాని అయోమయం.
 ఆ అయోమయంలోనుండి ఎప్పుడు బయటపడ్డామో కూడా తెలియదు!!

 తను రోజూ ఫోను చేసే సమయానికి అలవాటయిన ఎదురుచూపులు...
ఈ రోజేంటి ఇంకా ఫోను చెయ్యలేదు అనుకునే అలవాటు పడ్డ మనస్సు..
అమ్మో నాన్నకి తెలిస్తే ఊరుకోరు అని మనసులో అలానే ఉన్న భయం..
ఎక్కడో ఉండి మమ్ముల్నందరిని  చూస్తూనే  ఉంటారన్న ఓ భ్రమ..
లేరని తెలిసినా దేన్నని మర్చిపోగలం!!!

చీకటి పడ్డాక ప్రయాణం చెయ్యకండి!
మీకు బాగా వర్షాలంట కదా...ఆయన .పిల్లలు ఇంటికి వచ్చారా?
మీ హైదరాబాదులో బాగా గొడవలంట కదా..
మీ వైపు ఎలా ఉంది? ఏమయినా గొడవలున్నాయా!
పిల్లాడు ఈ రోజు పరీక్ష బాగా వ్రాసాడా?
వడ్లకి బాగా రేటు వచ్చింది..అమ్మేయమంటావా?

ప్రతి నిత్యం...అడుగడుగునా  పలకరింపులు..పరామర్శలు..
మందలింపులు..సలహాలు..సూచనలు.
ఇప్పుడేవి ఆ పలకరింపులు..పరామర్శలు...
ఏవీ ఆ మందలింపులు? ఇంకెవరిస్తారు సలహాలు..సూచనలు

మీ అమ్మని పని తగ్గించుకోమంటే తగ్గించుకోవటం లేదు..
రేపు మంచానపడితే ఆమెని చూసేది ఎవరు అంటూ
 తనే ముందు వెళ్లిపోయారు ఎవరి చేత చూపించుకోకుండా..ఏమీ చేయించుకోకుండా.

జీవితం ఎంత చిత్రమయింది.
 మన మనిషి మనకి దూరం అయిన రోజు ఇంకేం మిగిలింది..
అంతా  శూన్యమే అన్నట్టు ఉంటుంది.
 మరుసటి రోజునుండి మన జీవితం మనం అంతా షరా మామూలే.
 మన ఆకలి మనతోనే ఉంటుంది.
మన నిద్ర మనతోనే ఉంటుంది..
మన మనిషి తప్పితే మనది అన్నది ప్రతిదీ మనతోనే ఉంటుంది
ఎవరున్నా లేకపోయినా ఈ జీవిత నాటకం నడుస్తూనే ఉంటుంది
ఈ నాటకంలో మన పాత్ర పూర్తయ్యే వరకు
ఎవరికి ఏమయినా మనకేమీ కాదు
ఏదీ శాశ్వతం కాదు అనే ఓ వేదాంత ధోరణిలో
మనకు మనం నచ్చ చెప్పుకుంటాం
బ్రతుకు బండి లాగించేస్తుంటాం
మన జీవితాల్లోంచి ఎవరు వెళ్లిపోయినా మనం ఇంతేనా!

మా నాన్న చెప్పాపెట్టకుండా మాకు దూరం అయి సంవత్సరం అయిన సందర్భంగా...

Read more...

వీనులవిందు....చూడ పసందు

విశ్వనాథ్.... జయప్రదం (మా టి.వి)
బాలు..ఉషా.... పాడుతా తీయగా (ఈ.టి.వి)
వంశీ.... సూపర్ సింగర్ 6 (మా టి.వి)

ఇవి రాత్రి టి.వి లో వచ్చిన కార్యక్రమాలు..వాటికి విచ్చేసిన అతిథులు
.
విశ్వనాథ్ జయప్రదం:  జయప్రదం  కార్యక్రమాన్ని సెలెబ్రిటీలతో చెయ్యటం మూలాన జయప్రదని భరిస్తున్నామేమో అనిపిస్తుంది నాకు.  ఈ మధ్య జయప్రదని అసలు చూడబుద్ది కావటం లేదు..తనకి నప్పని మేకప్పు, కేశాలంకరణ...అసలు ఈమె జయప్రదేనా అని ఆమె అభిమానులు ఒకింత నిరాశపడే ఆహార్యం.  కానీ రాత్రి మరి ఎదురుగా ఉన్నది విశ్వనాథ్ అవటం మూలానేమో కాస్త మునుపటి జయప్రదని చూడకలిగాం.  సామాన్యంగా గంభీరంగా ఉండే విశ్వనాథ్ గారు బాగానే నవ్వించారు.

కళాతపస్వి విశ్వనాథ్..తన బిరుదునే తన ఇంటిపేరుగా చేసుకున్న కాశీనాథుని విశ్వనాథ్ అంటే ఇప్పటి తరానికి తెలియకపోవచ్చు.కళాతపస్వి విశ్వనాథ్‍గానే ఆయన ఇప్పటి తరానికి పరిచయం .ఆయనకి కళాతపస్వి బిరుదినిచ్చినప్పటి ఓ సంగతి గుర్తు చేసుకున్నారు.  ఓ సభలో ఈయన్ని ఆ బిరుదుతో సత్కరిస్తే..అయ్యా నేను ఈ బిరుదుకి తగిన వాడిని కాను..నాకు చాలా అలవాట్లు ఉన్నాయి...పాన్ తింటాను..ఇంకా చాలా చెడ్డ అలవాట్లు ఉన్నాయి నేను అర్హుడిని కాను ఈ బిరుదుకి అంటే... ఆ సభలో ఉన్న ఓ పెద్దాయన లేచి..తపస్వి అంటే మీసాలు గడ్డాలతో ముక్కు మూసుకుని తప్పస్సు చేసుకునే వ్యక్తి అని కాదు ఇక్కడ అర్థం..తను చేసే పనిని ఓ తపస్సులా...దీక్షగా చేసేవాడని అర్థం.. కాబట్టి మీరు ఈ బిరుదుకి అర్హులే అని సెలవిచ్చారట!

మొత్తానికి చాలా ఆహ్లాదంగా సాగింది ఈ కార్యక్రమం. ఇంతకుముందు ఎపిసోడులో రాధిక కూడా చాలా లవ్లీగా చేసింది కార్యక్రమాన్ని. అంతకుముందు కమల్ హాసన్...మొత్తానికి కాస్త బాగానే ఉంటుంది ఈ కార్యక్రమం. జయప్రదకి ఒక్కోసారి ప్రశ్నలని అడగటంలో కంట్యునిటీ తప్పుతుంది..మధ్యలో అవతలి వాళ్ళు ఏవో కబుర్లులోకి వెళ్ళిపోతుంటారు..దానితో ఈమె తనేం ప్రశ్న అడిగిందో కూడా మర్చిపోతుంది.

ఇక "పాడుతా తీయగా"....నేనయితే ఈ కార్యక్రమాన్ని ముఖ్యంగా బాలు కోసం ఆయన చెప్పే కబుర్ల కోసమే చూస్తాను. నిన్నటి కార్యక్రమానికి అతిధి గాయని ఉష.  ఈమె పాడుతా తీయగా ద్వారానే వెలుగులోకి వచ్చింది.  అప్పటి కబుర్లు పంచుకుంటూ బాలు ఉష చేత మిమిక్రీ చేయించి ప్రేక్షకులని కడుపుబ్బ నవ్వించాడు. ఝాన్సీ, సునీత, గాయని నిత్యసంతోషిణిలా ఆమె చేత మిమిక్రీ చేయించారు.  ఝాన్సీ లాగా చాలా బాగా చేసింది ఉష.  చివరగా బాలు లాగా కూడా చేసి అందరిని నవ్వులతో ముంచెత్తింది.  వచ్చేవారం కూడా తనే అతిథి.

చూడదగ్గ  టి.వి కార్యక్రమాలలో ఈ రెండిటిని చేర్చుకోవచ్చు.

సూపర్ సింగరులో నిన్న వంశీ కూడా ఒక అతిధిలా వచ్చారు..కాని ఎక్కువసేపు ఉన్నట్టు లేరు. పాడుతా తీయగా చూస్తూ ఈ కార్యక్రమాన్ని నేను ఎక్కువ చూడలేదు..మద్యమద్య చూసాను.

Read more...